1 Περὶ δὲ ὧν ἐγράψατε, καλὸν ἀνθρώπῳ γυναικὸς μὴ ἅπτεσθαι· peri de hōn egrapsate, kalon anthrōpō gynaikos mē haptesthai·
2 διὰ δὲ τὰς πορνείας ἕκαστος τὴν ἑαυτοῦ γυναῖκα ἐχέτω, καὶ ἑκάστη τὸν ἴδιον ἄνδρα ἐχέτω. dia de tas porneias hekastos tēn heaytoy gynaika echetō, kai hekastē ton idion andra echetō.
3 τῇ γυναικὶ ὁ ἀνὴρ τὴν ὀφειλὴν ἀποδιδότω, ὁμοίως δὲ καὶ ἡ γυνὴ τῷ ἀνδρί. tē gynaiki ho anēr tēn opheilēn apodidotō, homoiōs de kai hē gynē tō andri.
4 ἡ γυνὴ τοῦ ἰδίου σώματος οὐκ ἐξουσιάζει ἀλλὰ ὁ ἀνήρ· ὁμοίως δὲ καὶ ὁ ἀνὴρ τοῦ ἰδίου σώματος οὐκ ἐξουσιάζει ἀλλὰ ἡ γυνή. hē gynē toy idioy sōmatos oyk exoysiazei alla ho anēr· homoiōs de kai ho anēr toy idioy sōmatos oyk exoysiazei alla hē gynē.
5 μὴ ἀποστερεῖτε ἀλλήλους, εἰ μήτι ἂν ἐκ συμφώνου πρὸς καιρὸν ἵνα σχολάσητε τῇ προσευχῇ καὶ πάλιν ἐπὶ τὸ αὐτὸ ἦτε, ἵνα μὴ πειράζῃ ὑμᾶς ὁ σατανᾶς διὰ τὴν ἀκρασίαν ὑμῶν. mē apostereite allēloys, ei mēti an ek symphōnoy pros kairon hina scholasēte tē proseychē kai palin epi to ayto ēte, hina mē peirazē hymas ho satanas dia tēn akrasian hymōn.
6 τοῦτο δὲ λέγω κατὰ συγγνώμην, οὐ κατ’ ἐπιταγήν. toyto de legō kata syggnōmēn, oy kat’ epitagēn.
7 θέλω δὲ πάντας ἀνθρώπους εἶναι ὡς καὶ ἐμαυτόν· ἀλλὰ ἕκαστος ἴδιον ἔχει χάρισμα ἐκ θεοῦ, ὁ μὲν οὕτως, ὁ δὲ οὕτως. thelō de pantas anthrōpoys einai hōs kai emayton· alla hekastos idion echei charisma ek theoy, ho men ohytōs, ho de ohytōs.
8 Λέγω δὲ τοῖς ἀγάμοις καὶ ταῖς χήραις, καλὸν αὐτοῖς ἐὰν μείνωσιν ὡς κἀγώ· legō de tois agamois kai tais chērais, kalon aytois ean meinōsin hōs kagō·
9 εἰ δὲ οὐκ ἐγκρατεύονται γαμησάτωσαν· κρεῖττον γάρ ἐστιν γαμεῖν ἢ πυροῦσθαι. ei de oyk egkrateyontai gamēsatōsan· kreitton gar estin gamein ē pyroysthai.
10 τοῖς δὲ γεγαμηκόσιν παραγγέλλω, οὐκ ἐγὼ ἀλλὰ ὁ κύριος, γυναῖκα ἀπὸ ἀνδρὸς μὴ χωρισθῆναι, tois de gegamēkosin paraggellō, oyk egō alla ho kyrios, gynaika apo andros mē chōristhēnai,
11 ἐὰν δὲ καὶ χωρισθῇ, μενέτω ἄγαμος ἢ τῷ ἀνδρὶ καταλλαγήτω, καὶ ἄνδρα γυναῖκα μὴ ἀφιέναι. ean de kai chōristhē, menetō agamos ē tō andri katallagētō, kai andra gynaika mē aphienai.
12 τοῖς δὲ λοιποῖς λέγω ἐγώ, οὐχ ὁ κύριος· εἴ τις ἀδελφὸς γυναῖκα ἔχει ἄπιστον, καὶ αὕτη συνευδοκεῖ οἰκεῖν μετ’ αὐτοῦ, μὴ ἀφιέτω αὐτήν· tois de loipois legō egō, oych ho kyrios· ei tis adelphos gynaika echei apiston, kai ahytē syneydokei oikein met’ aytoy, mē aphietō aytēn·
13 καὶ γυνὴ εἴ τις ἔχει ἄνδρα ἄπιστον καὶ οὗτος συνευδοκεῖ οἰκεῖν μετ’ αὐτῆς, μὴ ἀφιέτω τὸν ἄνδρα. kai gynē ei tis echei andra apiston kai ohytos syneydokei oikein met’ aytēs, mē aphietō ton andra.
14 ἡγίασται γὰρ ὁ ἀνὴρ ὁ ἄπιστος ἐν τῇ γυναικί, καὶ ἡγίασται ἡ γυνὴ ἡ ἄπιστος ἐν τῷ ἀδελφῷ· ἐπεὶ ἄρα τὰ τέκνα ὑμῶν ἀκάθαρτά ἐστιν, νῦν δὲ ἅγιά ἐστιν. hēgiastai gar ho anēr ho apistos en tē gynaiki, kai hēgiastai hē gynē hē apistos en tō adelphō· epei ara ta tekna hymōn akatharta estin, nyn de hagia estin.
15 εἰ δὲ ὁ ἄπιστος χωρίζεται, χωριζέσθω· οὐ δεδούλωται ὁ ἀδελφὸς ἢ ἡ ἀδελφὴ ἐν τοῖς τοιούτοις· ἐν δὲ εἰρήνῃ κέκληκεν ὑμᾶς ὁ θεός. ei de ho apistos chōrizetai, chōrizesthō· oy dedoylōtai ho adelphos ē hē adelphē en tois toioytois· en de eirēnē keklēken hymas ho theos.
16 τί γὰρ οἶδας, γύναι, εἰ τὸν ἄνδρα σώσεις; ἢ τί οἶδας, ἄνερ, εἰ τὴν γυναῖκα σώσεις; ti gar oidas, gynai, ei ton andra sōseis ; ē ti oidas, aner, ei tēn gynaika sōseis ;
17 εἰ μὴ ἑκάστῳ ὡς μεμέρικεν ὁ κύριος, ἕκαστον ὡς κέκληκεν ὁ θεός, οὕτως περιπατείτω· καὶ οὕτως ἐν ταῖς ἐκκλησίαις πάσαις διατάσσομαι. ei mē hekastō hōs memeriken ho kyrios, hekaston hōs keklēken ho theos, ohytōs peripateitō· kai ohytōs en tais ekklēsiais pasais diatassomai.
18 περιτετμημένος τις ἐκλήθη; μὴ ἐπισπάσθω. ἐν ἀκροβυστίᾳ κέκληταί τις; μὴ περιτεμνέσθω. peritetmēmenos tis eklēthē ; mē epispasthō. en akrobystia keklētai tis ; mē peritemnesthō.
19 ἡ περιτομὴ οὐδέν ἐστιν, καὶ ἡ ἀκροβυστία οὐδέν ἐστιν, ἀλλὰ τήρησις ἐντολῶν θεοῦ. hē peritomē oyden estin, kai hē akrobystia oyden estin, alla tērēsis entolōn theoy.
20 ἕκαστος ἐν τῇ κλήσει ᾗ ἐκλήθη ἐν ταύτῃ μενέτω. hekastos en tē klēsei hē eklēthē en taytē menetō.
21 δοῦλος ἐκλήθης; μή σοι μελέτω· ἀλλ’ εἰ καὶ δύνασαι ἐλεύθερος γενέσθαι, μᾶλλον χρῆσαι. doylos eklēthēs ; mē soi meletō· all’ ei kai dynasai eleytheros genesthai, mallon chrēsai.
22 ὁ γὰρ ἐν κυρίῳ κληθεὶς δοῦλος ἀπελεύθερος κυρίου ἐστίν· ὁμοίως ὁ ἐλεύθερος κληθεὶς δοῦλός ἐστιν Χριστοῦ. ho gar en kyriō klētheis doylos apeleytheros kyrioy estin· homoiōs ho eleytheros klētheis doylos estin christoy.
23 τιμῆς ἠγοράσθητε· μὴ γίνεσθε δοῦλοι ἀνθρώπων. timēs ēgorasthēte· mē ginesthe doyloi anthrōpōn.
24 ἕκαστος ἐν ᾧ ἐκλήθη, ἀδελφοί, ἐν τούτῳ μενέτω παρὰ θεῷ. hekastos en hō eklēthē, adelphoi, en toytō menetō para theō.
25 Περὶ δὲ τῶν παρθένων ἐπιταγὴν κυρίου οὐκ ἔχω, γνώμην δὲ δίδωμι ὡς ἠλεημένος ὑπὸ κυρίου πιστὸς εἶναι. peri de tōn parthenōn epitagēn kyrioy oyk echō, gnōmēn de didōmi hōs ēleēmenos hypo kyrioy pistos einai.
26 νομίζω οὖν τοῦτο καλὸν ὑπάρχειν διὰ τὴν ἐνεστῶσαν ἀνάγκην, ὅτι καλὸν ἀνθρώπῳ τὸ οὕτως εἶναι. nomizō oyn toyto kalon hyparchein dia tēn enestōsan anagkēn, hoti kalon anthrōpō to ohytōs einai.
27 δέδεσαι γυναικί; μὴ ζήτει λύσιν· λέλυσαι ἀπὸ γυναικός; μὴ ζήτει γυναῖκα. dedesai gynaiki ; mē zētei lysin· lelysai apo gynaikos ; mē zētei gynaika.
28 ἐὰν δὲ καὶ γαμήσῃς, οὐχ ἥμαρτες· καὶ ἐὰν γήμῃ ἡ παρθένος, οὐχ ἥμαρτεν. θλῖψιν δὲ τῇ σαρκὶ ἕξουσιν οἱ τοιοῦτοι, ἐγὼ δὲ ὑμῶν φείδομαι. ean de kai gamēsēs, oych hēmartes· kai ean gēmē hē parthenos, oych hēmarten. thlipsin de tē sarki hexoysin ohi toioytoi, egō de hymōn pheidomai.
29 τοῦτο δέ φημι, ἀδελφοί, ὁ καιρὸς συνεσταλμένος ἐστίν· τὸ λοιπὸν ἵνα καὶ οἱ ἔχοντες γυναῖκας ὡς μὴ ἔχοντες ὦσιν, toyto de phēmi, adelphoi, ho kairos synestalmenos estin· to loipon hina kai ohi echontes gynaikas hōs mē echontes ōsin,
30 καὶ οἱ κλαίοντες ὡς μὴ κλαίοντες, καὶ οἱ χαίροντες ὡς μὴ χαίροντες, καὶ οἱ ἀγοράζοντες ὡς μὴ κατέχοντες, kai ohi klaiontes hōs mē klaiontes, kai ohi chairontes hōs mē chairontes, kai ohi agorazontes hōs mē katechontes,
31 καὶ οἱ χρώμενοι τὸν κόσμον ὡς μὴ καταχρώμενοι· παράγει γὰρ τὸ σχῆμα τοῦ κόσμου τούτου. kai ohi chrōmenoi ton kosmon hōs mē katachrōmenoi· paragei gar to schēma toy kosmoy toytoy.
32 θέλω δὲ ὑμᾶς ἀμερίμνους εἶναι. ὁ ἄγαμος μεριμνᾷ τὰ τοῦ κυρίου, πῶς ἀρέσῃ τῷ κυρίῳ· thelō de hymas amerimnoys einai. ho agamos merimna ta toy kyrioy, pōs aresē tō kyriō·
33 ὁ δὲ γαμήσας μεριμνᾷ τὰ τοῦ κόσμου, πῶς ἀρέσῃ τῇ γυναικί, ho de gamēsas merimna ta toy kosmoy, pōs aresē tē gynaiki,
34 καὶ μεμέρισται. καὶ ἡ γυνὴ καὶ ἡ παρθένος ἡ ἄγαμος μεριμνᾷ τὰ τοῦ κυρίου, ἵνα ᾖ ἁγία καὶ τῷ σώματι καὶ τῷ πνεύματι· ἡ δὲ γαμήσασα μεριμνᾷ τὰ τοῦ κόσμου, πῶς ἀρέσῃ τῷ ἀνδρί. kai memeristai. kai hē gynē kai hē parthenos hē agamos merimna ta toy kyrioy, hina ē hagia kai tō sōmati kai tō pneymati· hē de gamēsasa merimna ta toy kosmoy, pōs aresē tō andri.
35 τοῦτο δὲ πρὸς τὸ ὑμῶν αὐτῶν σύμφορον λέγω, οὐχ ἵνα βρόχον ὑμῖν ἐπιβάλω, ἀλλὰ πρὸς τὸ εὔσχημον καὶ εὐπάρεδρον τῷ κυρίῳ ἀπερισπάστως. toyto de pros to hymōn aytōn symphoron legō, oych hina brochon hymin epibalō, alla pros to eyschēmon kai eyparedron tō kyriō aperispastōs.
36 εἰ δέ τις ἀσχημονεῖν ἐπὶ τὴν παρθένον αὐτοῦ νομίζει ἐὰν ᾖ ὑπέρακμος, καὶ οὕτως ὀφείλει γίνεσθαι, ὃ θέλει ποιείτω· οὐχ ἁμαρτάνει· γαμείτωσαν. ei de tis aschēmonein epi tēn parthenon aytoy nomizei ean ē hyperakmos, kai ohytōs opheilei ginesthai, ho thelei poieitō· oych hamartanei· gameitōsan.
37 ὃς δὲ ἕστηκεν ἐν τῇ καρδίᾳ αὐτοῦ ἑδραῖος, μὴ ἔχων ἀνάγκην, ἐξουσίαν δὲ ἔχει περὶ τοῦ ἰδίου θελήματος, καὶ τοῦτο κέκρικεν ἐν τῇ ἰδίᾳ καρδίᾳ, τηρεῖν τὴν ἑαυτοῦ παρθένον, καλῶς ποιήσει· hos de hestēken en tē kardia aytoy hedraios, mē echōn anagkēn, exoysian de echei peri toy idioy thelēmatos, kai toyto kekriken en tē idia kardia, tērein tēn heaytoy parthenon, kalōs poiēsei·
38 ὥστε καὶ ὁ γαμίζων τὴν ἑαυτοῦ παρθένον καλῶς ποιεῖ, καὶ ὁ μὴ γαμίζων κρεῖσσον ποιήσει. hōste kai ho gamizōn tēn heaytoy parthenon kalōs poiei, kai ho mē gamizōn kreisson poiēsei.
39 γυνὴ δέδεται ἐφ’ ὅσον χρόνον ζῇ ὁ ἀνὴρ αὐτῆς· ἐὰν δὲ κοιμηθῇ ὁ ἀνήρ, ἐλευθέρα ἐστὶν ᾧ θέλει γαμηθῆναι, μόνον ἐν κυρίῳ. gynē dedetai eph’ hoson chronon zē ho anēr aytēs· ean de koimēthē ho anēr, eleythera estin hō thelei gamēthēnai, monon en kyriō.
40 μακαριωτέρα δέ ἐστιν ἐὰν οὕτως μείνῃ, κατὰ τὴν ἐμὴν γνώμην, δοκῶ δὲ κἀγὼ πνεῦμα θεοῦ ἔχειν. makariōtera de estin ean ohytōs meinē, kata tēn emēn gnōmēn, dokō de kagō pneyma theoy echein.