1 [Fili, peccasti, non adjicias iterum : sed et de pristinis deprecare, ut tibi dimittantur. Notesn1 Fili, peccasti, etc. RAB. Consilium dat, cum peccamus : Non est enim qui faciat bonum, et non peccet Eccle. 7., ne iterum peccemus ; sed de præteritis pœnitentiam agamus, deprecantes ut nobis dimittantur.
2 Quasi a facie colubri fuge peccata : et si accesseris ad illa, suscipient te. Notesn1 Colubri. ID. Diaboli qui semper colit umbras peccati, et regnat in filiis tenebrarum.
3 Dentes leonis dentes ejus, interficientes animas hominum. Notesn1 Dentes leonis, etc. Adversarius noster diabolus, tanquam leo rugiens, circuit quærens quem devoret I Petr. 5..
4 Quasi rhomphæa bis acuta omnis iniquitas : plagæ illius non est sanitas.
5 Objurgatio et injuriæ annullabunt substantiam, et domus quæ nimis locuples est annullabitur superbia : sic substantia superbi eradicabitur. Notesn1 Objurgatio et injuriæ, etc. ID. Concordia minimæ res crescunt, etc., usque ad quia veritatem fidei et unitatem pacis abominatur.
6 Deprecatio pauperis ex ore usque ad aures ejus perveniet, et judicium festinato adveniet illi. Notesn1 Deprecatio pauperis, etc. Quia judicabit Deus impios, qui affligunt sanctos.
7 Qui odit correptionem vestigium est peccatoris, et qui timet Deum convertetur ad cor suum. Notesn1 Correptionem. Id est, judicium sui peccati, quia mentem suam induravit, ne obediret veritati.
8 Notus a longe potens lingua audaci, et sensatus scit labi se ab ipso. Notesn1 Notus a longe. Manifestatur præsumptio hæretica in lingua temeraria, quæ loquitur adversus Deum iniquitatem.
9 Qui ædificat domum suam impendiis alienis, quasi qui colligat lapides suos in hieme. Notesn1 Qui ædificat domum, etc. Hæreticum significat, qui Scripturæ testimonia a pravo sensu aliena, ad confirmationem sui erroris congregat. Sed vindicta ultionis justæ dissolvetur duritia nefandæ actionis ; vel tropologice : Avarum raptorem, qui ex alienis rebus auget divitias, et vacuus omnibus bonis in die judicii pro iniquitate sua punietur.
10 Stupa collecta synagoga peccantium, et consummatio illorum flamma ignis.
11 Via peccatorum complanata lapidibus : et in fine illorum inferi, et tenebræ, et pœnæ.] Notesn1 Via peccantium. Ideo velox malorum interitus, quia via, id est vita illorum plena est doloribus : et duris peccatorum operibus.
12 [Qui custodit justitiam, continebit sensum ejus.
13 Consummatio timoris Dei, sapientia et sensus.
14 Non erudietur qui non est sapiens in bono. Notesn1 Non erudietur, etc. RAB. His sententiis confundit, etc., usque ad et ipse immiscuit se infinitis quæstionibus.
15 Est autem sapientia quæ abundat in malo, et non est sensus ubi est amaritudo.
16 Scientia sapientis tamquam inundatio abundabit, et consilium illius sicut fons vitæ permanet.
17 Cor fatui quasi vas confractum, et omnem sapientiam non tenebit.
18 Verbum sapiens quodcumque audierit scius, laudabit, et ad se adjiciet : audivit luxuriosus, et displicebit illi, et projiciet illud post dorsum suum. Notesn1 Displicet illi, etc. Unde : Filii hujus sæculi prudentiores filiis lucis in generatione sua sunt Luc. 16..
19 Narratio fatui quasi sarcina in via : nam in labiis sensati invenietur gratia.
20 Os prudentis quæritur in ecclesia, et verba illius cogitabunt in cordibus suis.
21 Tamquam domus exterminata, sic fatuo sapientia : et scientia insensati inenarrabilia verba.
22 Compedes in pedibus, stulto doctrina : et quasi vincula manuum super manum dextram. Notesn1 Compedes in pedibus, etc. ID. Quia gressibus eorum, quibus incedunt, ruina iniquitatis contradicit, actiones eorum damnando reprehendit.
23 Fatuus in risu exaltat vocem suam : vir autem sapiens vix tacite ridebit. Notesn1 Fatuus in risu, etc. Cœtus hæreticorum plausibili operatione per rhetoricam artem docendo quærit auditorum favorem. Sancti vero doctores jucunditatem locutione sic intermiscent prædicationi, ut non recedant a tramite veritatis.
24 Ornamentum aureum prudenti doctrina, et quasi brachiale in brachio dextro.
25 Pes fatui facilis in domum proximi : et homo peritus confundetur a persona potentis. Notesn1 Pes fatui, etc. Quia hæretici auctorum suorum sectam in domicilio scriptorum suorum latitantem student imitari.
26 Stultus a fenestra respiciet in domum : vir autem eruditus foris stabit. Notesn1 Stultus a fenestra. ID. Notat hæreticorum calliditatem, et catholicorum simplicitatem.
27 Stultitia hominis auscultare per ostium : et prudens gravabitur contumelia.
28 Labia imprudentium stulta narrabunt ; verba autem prudentium statera ponderabuntur.
29 In ore fatuorum cor illorum, et in corde sapientium os illorum.
30 Dum maledicit impius diabolum, maledicit ipse animam suam. Notesn1 Dum maledicit. Non quia maledictum dicit diabolum, sed quia quem maledictum novit, non cessat imitari. Dum enim mavult diabolum imitari, quam Christum, jure damnatur.
31 Susurro coinquinabit animam suam, et in omnibus odietur, et qui cum eo manserit odiosus erit : tacitus et sensatus honorabitur.]